ТР Чазаанда организастыг комитет Шагаа уткууру-биле Тоолай чылының эге хүннеринде хөй санныг байырлыг хемчеглерни кылыр дээн. Оларны хөй хонуктарда кылган.

Январь 20-ден эгелеп бичии уругларга Шагаага хамаарылгалыг оюннар, ном делгелгелери К.Чуковский, А.Гайдар, Н.Крупская, А.Пушкин, С.Есенин, М.Горький аттыг библиотекаларга, Р.Кенденбиль аттыг уран-чүүл школа-интернадынга, уругларның туризм төвүнге болур. Февраль 2-ниң 21.00 шактан февраль 3-түң 5.00 шакка чедир лама-башкылар күрүне филармониязынга, С.Пюрбю аттыг улусчу чогаадылга бажыңынга, “Енисей” культура төвүнге мөргүл номчуурлар. Февраль 3-те эртенгиниң 5.00 шакта Тываның хамнары Бии-Хем биле Каа-Хемниң каттышкан чериниң дужунга Национал паркка саң салырлар.      

Ол-ла хүн 12.00 шакта Арат шөлүнге “Шаг чаагай, Шагаа чаагай! Курай-Курай!” деп көргүзүгнүң соонда спортчу-массалыг болгаш национал оюннарның мөөрейи болур. 14.00 шакта Кызылдың уран-чүүл колледжиниң улуг залынга оюннар биле кады байырлыг концерт болур. 17.00 шакта В.Көк-оол аттыг хөгжүм-шии театрынга театр артистериниң Шагаага уткуштур концерти көрдүнген. 18.00 шакта С.Пюрбю аттыг улусчу чогаадылга бажыңынга концерт программалыг национал оюннар мөөрейи болур. Февраль 4-те 15.00 биле 18.00 шактарда улусчу чогаадылга бажыңынга тыва эстраданың аныяк артистери, а 17.00 шакта хөгжүм шии-театрынга театр артистери уран талантызын чонга бараадырлар. Февраль 5,6 хүннеринде школачылар солун хемчеглерге киржирлер.