Тываның эң улуг дээди өөредилге чери – күрүне университеди январь 21-ден февраль 12-ге чедир Тыва Республикада Эртем хүннерин эрттирер деп шиитпирлээн. ТывКУ-нуң эртем талазы-биле болгаш чурттар аразының харылзаазының проректору Ольга Хомушку дараазында медээни берген.      

Бо эртем байырлалынга университеттиң шупту факультеттери: экономика, бойдус-география, филология, төөгү, инженер-техниктиг, физика-математика, көдээ ажыл-агый, күш-культура болгаш спорт, юридиктиг – олар болгаш педагогиктиг институт, педагогиктиг колледж киржирлер. Программа байлак болгаш янзы-бүрү. Хоорайның школаларының өөреникчилери “Ажык эжиктерже” чалаттынган. Делгелге-конкурстар, экскурсиялар, мастер-класстар, “төгерик столдар”, презентациялар, илеткелдер, дискуссиялар, семинарлар, ужуражылгалар Эртем хүннеринде көрдүнген. ТывКУ-нуң эртем библиотеказы билдингир эртемденнер-биле ужуражылгаларны кылып, семинарларны эртирер. Төөгү факультединде Төп Азияның чоннарының культуразының болгаш төөгүзүнүң музейи Шагаа дугайында “төгерик столду” организастаар. Студенчи бизнес-инкубатор солун чүүлдерни көргүзер.

Февраль 8-те ТывКУ-нуң хуралдаар залынга эртемге чедиишкиннер-биле шылгараан улусту байырлыг байдалга  шаңнаар.