Республиканың Р. Кенденбиль аттыг уран-чүүл училищезинден чаа чыл эгезинден өөредилге хайныышкынныг эгелээн. Уран-чүүлге: музыкага, чурулгага, танцы-самга ховар дээн салым-чаяанныг республиканың 210 оолдар, уруглары база ховар дээн чаяанныг 70 башкыларының дузазы-биле өөренип, чурттап турарлар. Февраль 2-3-те болур Шагаага уруглар башкылары-биле кады чогаадыкчы арга-биле белеткенип турарлар. Ховар салым-чаяанныг уруглар Тоолай чылын оюн-тоглаа, янзы-бүрү мөөрейлер-биле уткуурлар.        

2010 чылда Башкылар чылы кылдыр бистиң чуртка чарлаттынган турган. Уругларның уран-чүүл школазының өөредилге талазы-биле эргелекчизи Халбы Марианна дараазында медээни берген.  

Башкылар чылының түңнелин уран-чүүл школазының удуртулгазы ада-иелер, өөреникчилер-биле кады үндүрер деп турар. Башкылар аразында дараазында чадаларлыг конкурстар эрттер. Бирги чадада – башкылар боттарының веб-сайтызын көргүзүп, камгалаарлар. Ийиги чадада, “Мээң башкылаашкыным дөзү” деп аттыг мөөрейге башкылар боттарының эртеминиң аайы-биле “чажыттарын” ажыдарлар. Үшкү чадада – “Ажык кичээл”. Тускай жюри бо солун кичээлге үнелелди бээрлер. Жюриде чүгле башкылар эвес, хөй-ниити төлээлери, оларның аразында ада-иелер база бар. Башкылар аразында бо мөөрей январь 26-дан эгелээш, февраль 1-де, Шагаа бүдүүзүнде доостур. Гран-при шаңналды ТР культура яамзы тыпсыр. Өске шаңналдарга уран-чүүл школазының удуртулгазы деткикчилерни дилеп турар. “Салымныг чаштарны деткиир албан-черлери, кижилер тыпты бээр” деп Марианна Халбы бүзүрелдиг чугаалап турар.      

Уран-чүүлдүң белен эвес чажыттарын чедип аарда, бичии чаштарга таарымчалыг байдал негеттинери чугула. Бо талазы-биле Р. Кенденбиль аттыг уран-чүүл школазының директору Валерий Оюн чогаадыкчы езу-биле ажылдап турары көскү. Бо хүннерде уругларның өөредилге өргээзиниң дөрткү каъдында евроремонт эгелей берген. Чаа септелге салым-чаяанныг уругларның өөредилгезинге шаптыктавайн турар.